عبدالسلام عبيد البليبل: طقوس العيد الرقيّة.. زيارة المقابر

 

عبدالسلام عبيد البليبل *

- تأخرنا يوووم... صارت الساعة 2 وما جت التكسي.
- خلونا نخبّر على خوالي يدزّولنا البيكام.
- دي ياالله خبريهم.. ما يگولون شي.. يوصلونا ويرجعون ياخذونا قبل الزّلم ما تجي عالكُبور..
- خبرتهم يوم.. يُمّة.. ألحز يجون.. جهزم "الغراض".. الورد والعودان الخضر.. لا تنسون جيس الكَرميلة والكليجات.
- آني خذيت المصحف.. البسن بسرعة..
- اخذن سطل المَي.. وطاسة تا نرش قبورنا..
* * * * *
بيييب.. بييييييب..
- وصل البيكام.. بسع.. ترى ابن خالي عصبي.. اطلعن.. اطلعن..
- طوّل بالك ياخي.. بهوادة على حبّابتك.. لا تنسن شي يا بنيات من الغراض.. وهاتي الطرّاحة الخضرا لحبّابتي..
والباكورة.. يا الله يا بنيات.. عجلن.
* * * * *
- الطلعة بالبيكام أخير من التّكسي.. دحگي الهوا شلون يلعب.. بالله إن ليل الرگة ما بُو منّو بكل الدّنيا.
- شعليلي سيكارة لبين ما نوصل.. واكمشي أخوچ.
- الزغير لا يطيح من السيارة.. ولفّي ملفعچ زين لا يطير.
* * * * *
- يا الله يا حبيبات.. وصّلنا.. انزلن.. وشواي أمر آخذچن.
- قبل صلاة العيد..
- بَعّد يا وليد.. روح عنّي.. خليني أنزل عالكَاع وبعدين أنطيك سُكرات.. وعيديّة..
- يا الله اش كثر بي ناس جاية عالگبور؟ كلها نسوان.. صبايا.. ولد زغار..
- دحگي البياعين.. والبسّاطين.. شوفي العجيان اش كثرهم.. محلقين.. جايين يتنصبون.
- امشي.. امشي.. شكارنا بيهم.. خلينا نقرا الفاتحة على روح الميتين:
- بسم الله.. الحمد لله رب العالمين.. آآمين.
- حبابتي تقول.. أهلنا ال صارم جوّا الگاع أكثر من أهلنا ال فوگ الگاع.. ودموعها بلّشت.. عجلي تا نشوف مكان نگعد عليه.. واحفظي نعّاوات حبابتي.. ما بي مثلهن.
لفم خديجة بورگ تيني
شيلم جدايلها عن الطيني
* * * * *
مفتاح صندوگچ خذننو
عفنات ما يستاهلننو
* * * * *
- بلشي قراية سورة "يس".. وآني أوزّع الكليج والسّكر
- تعالم يا ويلاااد.. هاك افتح ايديك.. ولا تنسى قراية الفاتحة.. وجيبلي سطل مَي تا أنطيك عيديّة.. بسَاع.
* * * * *
- دحگي عالشّباب الواكفين غاد.. الواكف عاليمين.
- من جيت وهوا يدحّچ عليَّ.. ما شال عينو..
- لبستو حلوة.. موووو..؟ مبيّن عليه أكابر..
- إي.. إي.. شايفتو.. أشوفچ ظليتي ساعة واكفة عالمراية.. وتعطرتي.. خاف بي شي؟
- لا.. لا.. ما بي شي.. وعلواه يصير شي..
- عيب أللا حرام.. كل شي بالحلال زين..
* * * * *
بيييييب.. بييييييب..

- أشوف بيكام خوالچ بسَاع رجع.. ما يمدانا نگعد..
- ول شلون بساع.
- صارلنا ساعتين.. والضو بلش يطلع.. بس آني فهمانة.
- عليچ.. الوكت يطير بوجود الحبايب.. موووووو..
* * * * *
- اطلعن يا بنيّات ورايا شغل.. بدي أروح أتحمّم.. وأصلّي صلاة العيد.. وأرجع أجيب الزلم عالقبور..
- ولا تنسن شي مثل العام الماضي.. وهاتيلي سكّرة.
- أحلّي بيها اُثمي..
- يابااااا.. والله ما عرفتج يا بنت عمتي.. صايرة غزالة.
- وحليانة.. وشغلتچ چبيرة!
- شفناك تجينا.. وتسال علينا.. شايف حالك.. مووو..
- خَلَف الله عالميتين ال خلّونا غزلان.. بعيونكم..

* خطاط وفنان تشكيلي سوري